واہ کیا مرتبہ ہوا تیرا
تو خدا کا خدا ہوا تیرا
تاج والے ہوں اس میں یا محتاج
سب نے پایا دِیا ہوا تیرا
ہاتھ خالی کوئی پھرا نہ پھرے
ہے خزانہ بھرا ہوا تیرا
آج سنتے ہیں سننے والے کل
دیکھ لیں گے کہا ہوا تیرا
اسے تو جانے یا خدا جانے
پیش حق رُتبہ کیا ہوا تیرا
گھر ہیں سب بند دَر ہیں سب تیغے
ایک دَر ہے کھلا ہوا تیرا
کام توہین سے ہے نجدی کو
تو ہوا یا خدا ہوا تیرا
تاجداروں کا تاجدار بنا
بن گیا جو گدا ہوا تیرا
اَور میں کیا لکھوں خدا کی حمد
حمد اُسے وہ خدا ہوا تیرا
جو ترا ہو گیا خدا کا ہوا
جو خدا کا ہوا ہوا تیرا
حوصلے کیوں گھٹیں غریبوں کے
ہے اِرادہ بڑھا ہوا تیرا
ذات بھی تیری اِنتخاب ہوئی
نام بھی مصطفیٰ ہوا تیرا
جسے تو نے دیا خدا نے دیا
دَین رب کی دِیا ہوا تیرا
ایک عالم خدا کا طالب ہے
اور طالب خدا ہوا تیرا
بزمِ اِمکاں ترے نصیب کھلے
کہ وہ دولھا بنا ہوا تیرا
میری طاعت سے میرے جرم فزوں
لطف سب سے بڑھا ہوا تیرا
خوفِ وَزْنِ عمل کسے ہو کہ ہے
دل مَدد پر تلا ہوا تیرا
کام بگڑے ہوئے بنا دینا
کام کس کا ہوا ہوا تیرا
ہر ادا دل نشیں بنی تیری
ہر سخن جاں فزا ہوا تیرا
آشکارا کمالِ شانِ حضور
پھر بھی جلوہ چھپا ہوا تیرا
پردہ دارِ اَدا ہزار حجاب
پھر بھی پردہ اُٹھا ہوا تیرا
بزمِ دنیا میں بزمِ محشر میں
نام کس کا ہوا ہوا تیرا
مَنْ رَّاٰنِیْ فَقَدْ رَاَی الْحَقّ
حسن یہ حق نما ہوا تیرا
بارِ عصیاں سروں سے پھینکے گا
پیش حق سر جھکا ہوا تیرا
یم جودِ حضور پیاسا ہوں
یم گھٹا سے بڑھا ہوا تیرا
وَصل وَحدت پھر اُس پہ یہ خلوت
تجھ سے سایہ جدا ہوا تیرا
صنع خالق کے جتنے خاکے ہیں
رنگ سب میں بھرا ہوا تیرا
اَرضِ طیبہ قدومِ والا سے
ذَرَّہ ذَرَّہ سما ہوا تیرا
اے جناں میرے گل کے صدقے میں
تختہ تختہ بسا ہوا تیرا
اے فلک مہر حق کے باڑے سے
کاسہ کاسہ بھرا ہوا تیرا
اے چمن بھیک ہے تبسم کی
غنچہ غنچہ کھلا ہوا تیرا
ایسی شوکت کے تاجدار کہاں
تخت تختِ خدا ہوا تیرا
اس جلالت کے شہریار کہاں
مُلک مُلکِ خدا ہوا تیرا
خلق کہتی ہے لامکاں جس کو
شہ نشیں ہے سجا ہوا تیرا
زِیست وہ ہے کہ حسن یار رہے
دِل میں عالم بسا ہوا تیرا
موت وہ ہے کہ ذِکر دوست رہے
لب پہ نقشہ جما ہوا تیرا
Free Up Space – Get Lyrics Without Bulky Screenshots!
Get it on Google Play
ہوں زمیں والے یا فلک والے
سب کو صدقہ عطا ہوا تیرا
ہر گھڑی گھر سے بھیک کی تقسیم
رات دن دَر کھلا ہوا تیرا
نہ کوئی دَوسرا میں تجھ سا ہے
نہ کوئی دوسرا ہوا تیرا
سوکھے گھاٹوں مرا اُتار ہو کیوں
کہ ہے دریا چڑھا ہوا تیرا
سوکھے دھانوں کی بھی خبر لے لے
کہ ہے بادَل گھرا ہوا تیرا
مجھ سے کیا لے سکے عدو اِیماں
اور وہ بھی دِیا ہوا تیرا
لے خبر ہم تباہ کاروں کی
قافلہ ہے لٹا ہوا تیرا
مجھے وہ دَرد دے خدا کہ رہے
ہاتھ دِل پر دَھرا ہوا تیرا
تیرے سر کو ترا خدا جانے
تاجِ سر نقش پا ہوا تیرا
بگڑی باتوں کی فکر کر نہ حسنؔ
کام سب ہے بنا ہوا تیرا
Popular Posts
