تو شاہِ خوباں تو جانِ جاناں

تو شاہِ خوباں تو جانِ جاناں
ہے چہرہ اُمّ الکتاب تیرا

نہ بن سکی ہے نہ بن سکے گا
مثال تیری جواب تیرا

تو سب سے اوّل تو سب سے آخر
ملا ہے حسنِ دوام تجھ کو

ہے عمر لاکھوں برس کی تیری
مگر ہے تازہ شباب تیرا

خدا کی قدرت نے ڈال رکھے
ہیں تجھ پہ ستر ہزار پردے

جہاں میں لاکھوں ہی طور بنتے
جو ایک بھی اٹھا حجاب تیرا

ہو مشک و عنبر یا بوئے جنت
نظر میں اس کی ہے بے حقیقت

ملا ہے جس کو ملا ہے جس نے
پسینہ رشکِ گلاب تیرا

میں تیرے حسن و بیاں کے صدقے
میں تیری میٹھی زباں کے صدقے

بہ رنگِ خوشبو دلوں پہ اترا
ہے کتنا دلکش خطاب تیرا

ہے تو بھی صائمؔ عجیب انسان
جو خوفِ محشر سے ہے ہراساں

ارے تو جن کی ہے نعت پڑھتا
وہی تو لیں گے حساب تیرا